കാഞ്ഞങ്ങാട്: ഭിന്നശേഷിക്കാരുടെ ഉന്നമനവും സ്വയംതൊഴിൽ കണ്ടെത്താനുള്ള പ്രോത്സാഹനവും ലക്ഷ്യമാക്കി കാഞ്ഞങ്ങാട് നഗരസഭ എട്ടുപേർക്ക് മുച്ചക്രവാഹനങ്ങൾ വിതരണം ചെയ്തു. നഗരസഭയുടെ 2025-26 വാർഷിക പദ്ധതിയിൽ ഉൾപ്പെടുത്തി 11.40 ലക്ഷം രൂപ വകയിരുത്തിയാണ് ഈ ക്ഷേമപദ്ധതി നടപ്പിലാക്കിയത്.

എ.സി. കണ്ണൻ നായർ പാർക്കിൽ നടന്ന വിതരണച്ചടങ്ങ് നഗരസഭാ ചെയർമാൻ വി.വി. രമേശൻ ഉദ്ഘാടനം ചെയ്തു. വൈസ് ചെയർപേഴ്സൺ ലത ബാലകൃഷ്ണൻ അധ്യക്ഷത വഹിച്ചു. ക്ഷേമകാര്യ സ്ഥിരംസമിതി അധ്യക്ഷ എം. സുമതി ചടങ്ങിൽ സ്വാഗതം പറഞ്ഞു. മറ്റു സ്ഥിരംസമിതി അധ്യക്ഷന്മാരായ എം.പി. ജാഫർ, മുഹമ്മദ് മുറിയനാവി, ഫൗസിയ ഷെരീഫ്, നഗരസഭാ സെക്രട്ടറി എം.കെ. ഗിരീഷ് എന്നിവർ സംസാരിച്ചു. ഐ.സി.ഡി.എസ്. സൂപ്പർവൈസർ ഗൗരീശ്രീ നന്ദി രേഖപ്പെടുത്തി.